Klara Beyers, voormalige joernalis, bestuur deesdae ’n gastehuis en blommeplaas op Somersee naby Hermanus.
Sy is heldersiende en voel onheil in haar nek begin kriewel die oggend toe Dewald Rademeyer sonder ’n bespreking op haar drempel staan. ’n Dag later daag Judi Dench, ’n misterieuse Siamese kat met ’n oënskynlik verskerpte sesde sintuig, ook by die gastehuis op en dis nie lank nie of Dewald se lyk word met ’n naaldwerkskêr in sy nek gevind.
Kolonel Mack Biesenbach van Kaapstad en kaptein Schalk Mocke is eerste op die misdaadtoneel waar hulle ’n geskokte Klara met bloed op haar hande aantref.
’n Knippie moord is humoristies, propvol kinkels en kleurryke karakters, en natuurlik ook ’n tikkie romanse!