Douwenis is ’n meesleurende historiese roman oor wat gebeur wanneer ’n gemeenskap se geheime nie langer begrawe kan bly nie.
Wanneer die moord op Hesje van der Merwe die Hantamwyk in rep en roer bring, word die Van der Merwe-familie se naam, eer en skuld onder die vergrootglas geplaas.
Maar elke “getuie” vertel ’n ander weergawe van dieselfde waarheid. Met veelvuldige vertellers en tydspronge ontvou die verhaal rondom die aanloop tot en nasleep van die moord.
Uiteindelik bevind die 21-jarige Carel van der Merwe hom op 1 Julie 1838 in ’n sel in Kaapstad, waar hy op die vooraand van ’n uitspraak wag wat oor sy lewe sal beslis.
Terwyl sy regsverteenwoordigers en die publiek die saak as buitengewoon beskou, word die grense tussen skuld, waarheid en geregtigheid al hoe meer vervaag.
Douwenis is ’n verhaal van mag en afhanklikheid, geloof en geweld, liefde en verraad – en van ’n vonnis wat uiteindelik nie net oor een man gaan nie, maar oor ’n hele gemeenskap se gewete.